रुपन्देही-२ कांग्रेसको क्षेत्रीय सभापतिमा संस्थापन इतर समूहबाट ढकालको उम्मेदवारी घोषणा

बुटवल । नेपाली कांग्रेस रुपन्देही क्षेत्र नम्बर २ को सभापतिका लागि बुधबार संस्थापन इतर समूहले उम्मेदवारी घोषणा गरेको छ । बुटवलमा शेखर कोइराला समूहले बुटवल उपमहानगरपालिकाका नगरप्रमुख खेलराज पाण्डेयको उपस्थितिमा फर्सुराम ढकाललाई सभापतिको उम्मेदवार बनाउने घोषणा गरेको हो । ढकाल कार्यबहाक सभापतिका रुपमा रहेका थिए ।

रिक्त रहेको सभापति पदमा सहमति जुट्न नसकेकेपछि संस्थापन पक्ष र इतर पक्ष दुवैले उम्मेदवार खडा गरेका छन् । स्थानीय तहको निर्वाचनमा उम्मेदवार सिफारिसको विषयलाई लिएर असन्तुष्ट हुँदै सभापति हरि लम्सालले ०७९ वैशाख ९ गते साधारण सदस्यसमेत नरहने गरी राजीनामा दिएका थिए । सभापतिका राजीनामापछि उक्त पद १८ महिनादेखि रिक्त छ ।

सहमतिको प्रयास विफल भएपछि सभापति पदका लागि ढकाललाई अगाडि सारिएको कोइराला पक्षको भनाई छ । सो अवसरमा ढकालले पार्टीलाई एकताबद्ध, गतिशील र आउँदो निर्वाचनमा बढीभन्दा बढी सिट ल्याउने योजनासहित आफू सभापतिमा उठ्न लागेको बताए ।

पार्टीभित्र रहेका असन्तुष्टि हटाउने र पार्टीलाई साझा बनाउने आफ्नो प्रमुख भूमिका हुने उनले दाबी गरे । असोज २७ गते हुने सभापतिको निर्वाचनमा ६७२ प्रतिनिधिले मतदान गर्नेछन् । संस्थापन पक्षबाट भने प्रजापाल गिरी सभापतिको उम्मेदवार बन्ने सम्भावना बढी छ । यद्यपि, उक्त पक्षबाट औपचारिक निर्णय भने गराइएको छैन ।