ताजा अपडेट »

क्षेत्री समाज नेपालको दोस्रो केन्द्रीय परिषद भेला चैत ४ र ५ गते बुटवलमा

बुधबार, ०१ चैत्र २०७९

बुटवल । क्षेत्री समाज नेपालको दोस्रो केन्द्रीय परिषद भेला बुटवलमा हुने भएको छ । समाजको भेला यही चैत ४ र ५ गते बुटवलमा हुने भएको हो

भेलाको पुर्वसन्ध्यामा बुधबार बुटवलमा पत्रकार सम्मेलनको आयोजना गरेर समाजले हिन्दु राष्ट्र घोषणा र जातीय आरक्षण खारेज नगरे आन्दोलन गर्ने चेतावनी दिएको छ । समाजले आम खस क्षत्री जातीलाई आदीवासी जातीमा सूचीकृत गर्न, आरक्षणको व्यवस्था जातीय नभई वर्गीय आधारमा गर्न, विपन्न, गरिव, पीछडिएका वर्गलाई जातीयरुपमा नहेरी सहयोग आरक्षण व्यवस्था गर्न, खस र आर्यको व्यवस्था अलग अलग रुपमा गर्न पनि माग गरेको छ ।

त्यस्तै राष्ट्र र राष्ट्रियताविरुद्ध हुने सबैखाले हस्तक्षेप बन्द गर्न, खस राष्ट्रिय आयोगको गठन गर्न, आर्थिक तरलता व्यवस्थापन, रोजगारी सिर्जना गर्न र क्षत्री समाजको नेतृत्वमा भएको विविध आन्दोलनहरुमा सरकारले गरेको सम्झौताको पूर्ण कार्यान्वयन गर्न पनि समाजले माग गरेको छ ।

समाजले आफ्ना मागहरुलाई केन्द्रीय परिषद भेलामार्फत प्रभावकारीरुपमा उठाइने भन्दै यसका लागि दवावमूलक कार्यक्रम गर्ने बताएको छ । केन्द्रीय परिषदको पहिलो दिन बुटवल बजारको परिक्रमा सहित समाजको भवन रहेको स्थान हिलपार्कमा पुगी सभामा परिणत हुने केन्द्रीय उपाध्यक्ष एवं प्रचारप्रसार संयोजक विष्णुबहादुर थापाले बताए । दोस्रो दिन केन्द्रीय, प्रदेश, जिल्ला तथा भातृ समाजका प्रतिनिधिहरुको भेला हुने महासचिव केशबहादुर केसीले जानकारी दिए । भेलामा देशभरका प्रतिनिधि गरि ३०० रहने कार्यक्रम सयोजक थापाले बताए ।