ताजा अपडेट »

वडासदस्य र डोके व्यापारको कार्यभार निभाएकी टंकीकला

सोमबार, ३० जेठ २०७९

रिडीबजार । गाउँमा सबैले भनेपछि संघीयता पछिको पहिलो निर्वाचनमा वडा सदस्यको उम्मेदवार बनेर तानसेन नगरपालिका वडा नं. १४ बाट जितेकी टँकीकला वि.क. ले जन प्रतिनिधिको रुपमा पाँच वर्ष विताए पनि तरकारी व्यापारको डोको भने कहिल्यै बिसाईनन ।

तानसेन नगरपालिका वडा नं. १४ रविदासमा घर भएकी टंकीकला दैनिक ५ किलोमिटर पैदल हिँड्दै डोकोमा तरकारी बोकेर रिडीबजार आईपुग्छिन दिनभरि तरकारी बेच्छिन र साँझ घर फर्किन्छिन यो उनको दिनचर्या हो । कहिले आफ्नो बारीमा लगाएको तरकारी त कहिले गाउँका किसान हरुको घरबाट खरिद गरेर उनले तरकारी रिडीबजारमा पुर्‍याउन थालेको सोह्र वर्ष वित्न थालेको छ ।

यहि तरकारी पेशाका कारण सबैसँग परिचित भएकाले २०७४ सालको निर्वाचनमा गाउँका सबैले उनलाई चुनाव लड्न सल्लाह पनि दिए र नेपाली काँग्रेसको टिकटबाट उनी विजयी भईन र दलित महिला सदस्यको रुपमा पाँच वर्ष विताईन ।
कहिल्यै राजनीतिमा हिँडेकी पनि थिईन तर सबैले पत्याएर जिताउनु भयो केही सिक्ने केही जान्ने मौका पाएँ सबैको सेवा गर्ने मौका पनि पाएँ उनले भनिन ।

पाँचवर्षे वडा सदस्यको कार्यकाल भरि मिटिँगको दिन बाहेक अरुदिन तरकारीको डोके व्यापारमा नै वित्थ्यो । गाउँमा खरिदेका सिमी, बोडि, मुला, काँक्रा, करेला , घिरम्ला, गोलभेँड, साग र सिजन अनुसारका हरेक तरकारी बोकेर रिडी बजार पुग्छिन उनी । केटा केटि पढ्दै छन, बुढि सासू श्रीमानले मात्र कमाएर नपुग्ने, मैले पनि केही कमाउन सकेँ भनेर यो तरकारी व्यापार रोजेकी हुँ ।

हुन पनि तरकारी बेचेरै उनले छोरा छोरी पढाएकी मात्र छैनन पक्की घर समेत बनाएकी छन ।उनका छोराले यतिबेला स्नातक पढिरहेका छन भने छोरीले एसइइ दिएकि छन । त्यसो त उनका पति नेत्रलाल विक पनि घर ठेक्कालिने काम गर्छन सँगै सिकर्मी पनि हुन ,दुवैजनाको परिश्रम ले दुईछाक खान उनिहरुको परिवारलाई दुख छैन । वडा सदस्यको चुनाव जितेपछि उनलाई तरकारीको डोके व्यापार छाड ,अब त नेता भयौ भनेर धेरैले भने ।

बरै नेता बन्दैमा आफ्नो पेशा छाडेर कसैले खान दिन्छ र रु मैले बरु राजनीति छाड्न सक्छु तरकारीको डोके व्यापार छाड्न सक्दिन भने, यो पटक पनि उठ त भनेका हुन भो बाबै अघाईयो भनेर उठिन टँकीकलाले भनिन । रिडीबजार क्षेत्रमा टँकीकलाको डोके तरकारी व्यापार यति ब्रान्ड बन्योकि एकदिन नआए उनलाई पटकपटक पटक तरकारीका ग्राहकले फोन गर्छन ।

नगद र उधारो दुवै व्यापार हुने उनले गर्ने तरकारी व्यापार बाट वर्षको पाँचलाख सम्म आम्दानी हुने गरेको उनको भनाई छ। जीवनका चौवालिस बसन्त पूरा गरेकी टँकीकलालाई कतिबेला पनि थकाई लाग्दैन । पाँच वर्ष तानसेन नगरपालिका वडा न ४ कि सफल जन प्रतिनिधि बनेर कार्यकाल पूरा गरेकी टँकीकला विकको डोके व्यापारको कार्यकाल भने निरन्तर जारी छ ।