रोल्पाका शनि विश्वकर्मा बने नेपाल लोक स्टार

कार्तिक ८,
ग्लोबल आवाज
काठमाण्डौ । शनि विश्वकर्मा लोक गायन रियालिटी शो ‘नेपाल लोक स्टार’ को विजेता बनेका छन् ।आज भृकुटीमण्डपमा सम्पन्न फिनालेबाट रोल्पाका शनि विजेता बनेका हुन् । नेपाल लोक स्टारको विजेता शनिले विश्वकर्माले उपाधिसँगै ५० लाख रुपैयाँको पुरस्कार हात पारेका छन् । यसका साथै उनले २५ लाख रुपैयाँ बराबरको जीवन बीमा पनि प्राप्त गरेका छन् । यस्तै स्याङ्जाका चेतन गोतामे लोकस्टारको दोस्रो बन्न सफल भएका छन् । उनले २५ लाख रुपैयाँ पुरस्कार र १५ लाख बराबरको जीवन बीमा प्राप्त गरेका छन् । उदयपुरका विनोद दनुवारले भने प्रतियोगितामा तेस्रो स्थानहासिल गरे । उनले १० लाख रुपैयाँ नगद पुरस्कारका साथै १० लाख रुपैयाँ बराबरकै जीवन बीमा प्राप्त गरेका छन् ।

‘नेपाल लोक स्टार’का अनुसार गएको शनिबार दिउँसो १२ बजेबाट शुक्रबार दिउँसो १२ बजेसम्म स्रोता तथा दर्शकले गरेको भोटको आधारमा विजेता घोषित भएका हुन् । नेपाल लोक स्टारमा निर्णायकको रुपमा वरिष्ठ कलाकार तथा गायक जयनन्द लामा, गायक रामजी खाँड, सुनिता दुलाल र वरिष्ठ संगितकार बीबी अनुरागी रहेका थिए । अडिसनदेखि विभिन्न राउण्डहरु पार गर्दै नेपाल लोक स्टार को ग्राण्ड फिनालेमा ४ प्रतिस्पर्धी पुग्न सफल भएका थिए ।